Kalurahan Kepek

SIDASAMEKTA KEPEK - Ing Desa Kepek wonten setunggal situs sejarah ingkang dumugi sakmenika taksih pun lestantunaken injih puniko Petilasan Kiyai Legi ingkang mapan wonten ing Padukuhan Ledoksari. Wekdal-wekdal tartamtu wonten poro peziarah engkang nggadahi hajat sami tirakat wonten papan meniko, keporo tiyang engkang rumaos kabul hajadipun sami gotong royong kalian wargo mbangun papan petilasan Kiyai Legi.

Manut cerita ingkang kita tampi saking para sesepuh ing Desa Kepek, mboten wonten ingkang mangertosi sinten sejatosipun  Kiyai Legi menika. Ananging dipun pitados Kiyai Legi menika salah satunggaling abdi dalem Karaton Ngayogyokarto Hadiningrat ingkang wekdal semanten ngayahi jejibahan wonten ing tlatah Gunungkidul. Wonten ing tengahing margi  ing tlatah kang aran Thok Ding, ( sakmenika  Padukuhan Ledoksari ) abdi dalem menika dipun begal dening poro brandal ngantos dumugining  pejah.  Jasadipun di  rukti lan dipun sarekaken dening wargo masyarakat sak kiwo tengening papan menika.  Lan kagem pengeling eling kedadosan meniko sakrehning dintenipun pasaran Legi, pramila dipun paringi tenger Kiyai Legi.